黃金是毒蛇

■一甕黃金

有一工，佛陀參阿難出外行化，忽然間佇庄跤路的水溝邊發現一甕黃金。佛陀講：「阿難，你看，彼是毒蛇！」。阿難斡頭看對水溝邊的草堆跤，回答佛陀講：「是啊！佛陀！我有看著，彼是毒蛇。」講煞，怹就繼續向前行。

這時陣，有一對爸仔囝拄佇就近田裡做穡，一聽著毒蛇，手攑著鋤頭、塗戕就走過來探看覓。怹一看，煞是一甕黃金，老爸就講：「現現是黃金，那會是毒蛇？佛陀、阿難敢會是目花去！」爸仔囝歡喜甲跤鬆手弄，就共黃金偷偷提轉去厝。本來過著真散赤的作穡人，一睏仔變成好額人。 

自按呢，彼個作穡人就毋免為三頓咧操勞辛苦，逐工閒仙仙過著真次序快活的日子。毋過怹隔壁的一個厝邊，看著怹忽然間好額起來，心肝就起僥疑佮怨妒，想欲知影怹按怎會變好額人，所以就暗中來調查。 

無偌久，對怹的一個細漢孫的喙裡，探查出是抾著黃金才會發大財，就去密告官府。彼當時印度的法律，百姓是不準私藏黃金。遮的黃金是匪徒對國庫偷提出來，這對爸仔囝煞夆嫌疑上大，就予官府掠去審問，受凌遲供口供，因為毋承認是匪徒最後被監禁。爸仔囝是去夆人刑甲半小死，規身軀傷痕纍纍，這個時陣才體會出佛陀參阿難怹講話的意思：「黃金正港是害人不淺的毒蛇」。

兩個心存懺悔，佇遐嗷嗷念：「阿難，你看，彼是毒蛇！」「是啊！佛陀！我有看著，彼是毒蛇。」獄卒是奉命來監視的，聽了這對爸仔囝規暝嗷嗷念，發覺代誌得事有一屑仔龜怪，就共所看所聽的老老實實報告頂司，傳到波斯匿王遐。國王是佛陀的弟子，就親身去請問佛陀，查明了真象就放怹爸仔囝出獄，干旦沒收怹一寡財產。

黃金叫毒蛇，想貪戴雞籠，莫取非淨財，解厄得消災。