想起二二八會心疼  

拖沙59年佇2006年228 ，彼面烏天暗地，血流遍野的紅旗仔，無啥情願屈腰向凌治的土地，頭犁犁向殘（tsan5）殺的台灣人會不是。

毋過，你免傷歡喜，1947年228的血抑是白白流，遐的殺手的子弟，食台灣放大垺屎佇台灣，刺夯夯的本性猶原無改，一直咧草踏毒化咱的土地，閣再咒衰咱臺灣，看咱臺灣人無起，反倒轉扶阿共的尻川，親像向怹祖媽咧施奶。

228講諒解，講仇恨放袂記，毋過，請恁，請恁，毋通藏傢俬，毋通佮大陸的飛彈，向對阮的心肝，向準準阮台灣的心肝。抑閣有，228殺人大兇手，請恁，請恁，毋通共化粧做慈祥的神祇，歷史的教訓毋通閣畫烏擦白拊拊去。