豪爽的序大 

    丁柴老先生（1920~2010）做人熱心，做過雲林縣台西鄉海口村的村長，伊做村長是欲來服務的，彼陣的待遇干焦一份報紙佮一千外箍的辦公費。伊時常提家己的私奇錢，倩人去摒掃排水溝，嘛定定共人排解糾紛，有時陣精差寥錢，嘛捌差一、兩萬箍，佇遐講袂好勢，家己就塌錢，予雙方會當完滿解決，這，就是伊的做人！

    丁柴老先生做人真豪爽、真好客，對朋友會使講是剖腹獻心肝，有情閣有義。看著朋友對門口經過，毋止相借問，閣親切招呼入來坐，若無請人啉一杯仔，人客袂使走，對朋友的重視，好像無較輸家庭。伊，對錢袂看重，早前的社會經濟無好，厝內三頓食的是蕃薯簽，有時陣趁較有食，才會摻一寡米煮蕃薯簽飯，一家大細就誠歡喜矣。

    有一改，丁柴老先生加買寡白米，拄好煮一鼎清飯，丁柴老先生就招呼幾個好朋友講：「今日有煮白米飯，逐家就免客氣留咧予我請。」佇彼久的海口勢，白米飯猶是足稀罕的年代，食食是「鹹瓜仔樹子，蕃薯簽仔撒米，脹袂肥，餓袂死」，聽講有白米飯，逐家就足歡喜無客氣共食一頓粗飽。人客看丁柴老先生的囡仔佇邊仔耍，就講「來！做伙來食！」無疑悟丁柴老先生煞應講：「無要緊，囡仔人愛食蕃薯簽！」伊的後生佇遐喙齒瀾強欲津出來，想欲按呢應老父講：「才無咧，阮較愛食白米飯！」毋過，隨人攏毋敢應喙應舌。