大某細姨 

有一個查甫人叫阿七仔，佇過年暗將伊的鬥陣的娶轉來厝內底過年，正式公開伊閣娶一個細姨，厝內底伊參老父、老母、大某蹛做伙。

食過年飯照例未使受氣講無吉兆的話，毋過氣氛實在真醜，大某看細姨心內一腹火，面仔膨獅獅人未爽快，是講嘛真好女德，無當場發性地。大某就講：「來來來！請用，食雞食雞，一夫著愛配一妻！」講了共怹翁睨一下，意思是你共我試覓。

細姨勢面看濟，嘛無通軟，硬拄硬，笑笑仔招呼逐家：「來來來！食魚食魚，有大某嘛著配細姨。」一時逐家目睭攏金金金斡過看阿七仔，看伊欲按怎排解。

哇！火藥味有夠重，阿七若做賊仔夆掠著，歹勢仔歹勢，就輕聲細說搓圓掟扁講：「來來來！食菜食菜，大某細姨我攏愛。」大某猶原面仔變變，細姨喙角笑微微。

這時陣老母看範勢，無來講和未使得，就開聲：「家和萬事成！來來來！食筍食筍，逐家著愛相吞忍！」這時氣壓有較坐落來，毋拘大某也是感覺足委曲，煞面憂面結含咧差一點仔就欲滴落來。

老父擋未椆就出聲教訓怹囝講：「來來來！啉湯啉湯查甫人敢做就愛敢擔當。」意思是講你有本事娶細姨，大某嘛愛安搭予四序。 

古早人講：「一某無人知，二某捨施代」，「家欲齊置兩犁，家欲破置兩妻」，「著愛想前補後補，毋通想娶前某後某」，毋過，煞拄著環境破壞教主企業之王某某人，伊有通天本領，有法度「大某無權利，細姨交鎖匙」，一家伙閣相安無代誌，世間人最近攏咧呵咾伊，敢講破壞生態污染環境趁大錢是應該？敢講好額有錢就會當娶細姨？敢講趁烏心錢做寡好代就真了不起？敢講有影「有錢使鬼會挨磨」，社會價值在名利，社會道德是非無！