2010-04-05圖文5656

　　郎攏難免欣羨別郎，因為別郎有家己無而欣羨，雖然到了阮的年歲亦還是會。

　　最近因為尪婿身軀小寡無爽快，阮無閒陪伊看醫生做復健，無心於平常做的練字、寫文、摃柴琴；一位網友將近八十歲阮叫伊「和姊」，和姊是阮三位年長的網友中之其中一位，序細手足攏置國外，一個郎置台灣過著自由自在、多采多姿黃金女郎般的生活；三不五時回覆阮的電子報時會提起伊充實的近況；阮講阮真欣羨慕伊；伊回予阮的電子批第一句話就叫醒阮這個老糊塗；伊講：「『人各有命』，目前參尪婿享受相親相愛、相扶持的日子上重要，其他攏是小問題，拄著好醫生是恁的好運氣，愛感謝喔！」

　　自細漢生長在無富裕的家庭，又失去慈愛的母親、青黃苦澀的少年、青年時代，到今年五十六歲雖然不斷安慰家己一切攏放予未記智，但只有家己的內心明白，外表的不在乎只是安慰家己，「痛疼」何時曾經放未記？

　　因為年歲吧，和姊送我這句「人各有命」就像一支鎖匙，拍開阮心肝底生銑的鐵鎖；和姊的這支鎖匙來了真拄好，偌阮閣少年十歲，相信猶無法度解開阮家己掛的重枷。