2007-10-15  本文讀音↑

　　早年賣雜細是用擔的，賣的攏是查某儂的物件，胭脂水粉、插頭毛的珠花、化妝鏡、針、線……攏是囥置兩個柴櫥仔阿，才用一支扁擔擔咧 、搖著玲瓏仔四界賣；相片中是較尾期裝輪仔用推的的櫥仔車，後來才演變到在地開店做生意。

　　有一種佮這種賣雜細的演變完全同款的就是賣醬菜，差不多置四五十年前每工吃早頓的時陣，攏有一種醬菜〈擔〉車沿路賣醬菜；醬菜種類真濟，甜的鹹的也攏有，但是叫賣的方式毋是親像賣肉粽用嘴嘩，抑毋是參像賣雜細按尼搖玲瓏；是置醬菜〈擔〉車吊一粒鐘 仔，所以當時若聽著搖鐘仔聲就知悉賣醬菜的來呀，真濟大儂囝仔就捧一塊盤仔出來買醬菜；只是醬菜後來演變做一罐一罐的罐頭。

　　時代咧進步，欲吃欲穿欲用攏真方便，但是總是感覺差一味厚厚的人情味。