|
|
|
文章數：135 |
 三百年前的狗屎疕【台文】 |
| 心情隨筆｜心情日記 2011/11/17 16:11:56 |
若毋是因為選舉，加害消滅母語的人竟然恥笑【thí-tshiò】候選人袂曉講母語的代誌；我心肝內彼搭【tah】已經凋【ta】去的粒仔疕【phí】，嘛袂閣予我khàng一擺，想起彼時受傷的心肝流血流滴。 阮以早庄跤所在的學區闊，國校仔一、二年佇離本校較遠所在的一間分校上課，蹛附近的讀冊囡仔五、六十個抾做一班，我行動無方便，公所分入學冊單來厝裡的時，阿爸叫我等小妹仔入學年歲到才同齊去讀冊，佇學校通好有人照顧我。就按呢，我參小妹仔成做同學，考試了我參小妹仔定定包辦班裡第一、二名，叔伯阿兄講我加人幾何歲，讀第一名是應當的。聽阿兄按呢講，感覺家己愛繼續認真讀冊，若無落去尾矣就歹勢；毋拘小妹仔真無客氣，定定搶著第一名。 來分校教阮一、二年的 自由自在的上課氣氛，一直到國校仔三年轉去本校上課就無仝矣。 我參小妹仔夆分佇無仝班，小妹仔佇丁班、我佇乙班。丁班的導師是一位生做真媠又閣少年的 我參小妹仔佇乙班，因為一直保持著真好的成績，受老師的肯定；學校有一位帶領樂隊的 無偌久，學校嚴格要求袂使得講父母話，若無愛佇胸前掛一塊牌仔，寫講：我以後不講方言。 這塊牌仔是咧教人講白賊話。阮兜阿爸是受日本教育、阿母無讀冊，汝講阮無講父母話，講［國語］欲講予誰【tsiâ】聽？ 莫講學生仔講國語有困難，連阮導師這種得欲退休、一世人講台語的老師，國語嘛講甲離離落落。這咧政策實在有夠糟蹋台灣人。 其實佇掛狗牌仔的事件內底，仝班的同學袂相害，門關起來台語放心仔講，佇下課時去別的班掠講台語的人。舞甲班佮班之間的學生處處提防，學校教咱同學之間愛【相親相愛】，煞為著講國語，逐家強欲變做冤仇人。即馬想起來，這才是真正分裂族群的手段啊！ 後來班裡轉來一个台北的查某同學，【台北人】佇當時庄跤所在是一个代表高尚的名詞，伊生做古錐、穿怹台北學校嫷嫷的制服吊帶仔裙、白色的襪仔佮一雙烏色的皮鞋。佇彼咧年代，莫講皮鞋，連塑膠鞋都真少人穿會起。上蓋得老師呵咾的，是伊講的【國語】有夠標準，該捲舌的就捲舌，無像阮講的是台灣國語。 老師共阮講：汝看、人伊［狗語縮得那麼好］，汝愛學伊。 其實老師的國語嘛講無好，阮欲學講標準的國語嘛無地學啊！ 後來彼位新同學的成績排佇尾尾尾，阮才知影，國語講著好，並毋是偌高尚的代誌、國語講著好，嘛毋是優秀的標誌。敢毋是？ 消滅咱母語的人、尾矣煞來笑咱袂曉講母語。天理何在？ 唉、害我又閣想起彼位媠媠的老師，拒絕我去伊彼班時的傷害。美麗的查某人、對我射一支無形的箭，傷痕到今亦閣咧幽幽仔疼。 可能汝會講、咱人愛向前看、毋好想無好的過去。 汝毋是我、汝一定毋知影予人嫌的經驗。所以，我又閣挖出來三百年前的狗屎疕，講予汝聽。 |
| 最新創作 |
|
||||
|
||||
|
||||
|
||||
|
||||
| 最新影像 | 2 本 20 張 |
|
|
|
|||||||||
