美麗的堅持

寫詩、寫文章是我二十外歲仔的夢想，嘛有參加過某一个寫作的函授學校，結局作品干焦一份小雜誌欲刊登，其他的攏是退稿，或者是石沈大海，免二年就無寫。無疑悟卻佇欲三十冬後，閣來寫詩、寫文章，真是「意外」！以前是寫華文，這馬是寫台文，更加是想袂到。

2000年9月參加西安里社區學苑跟綴蘇金順老師學習台語課程了後，佇2001年9月起就一步一步踏入台文創作之路。尤其是參加過2002、2003年第六、七屆南鯤鯓台語文學營，受著前輩的引導，深深感動、陶醉佇台語文學內兜。每擺品讀前輩的作品，內心充滿了歡喜、欣羨。尤其是2002年第四屆鹿耳門台灣文史營，結業的時得著台文創作新詩組第一名，彼（he）是真大推捒的力量。2004年7月得到第一屆海翁文學獎散文組《佳作》，不過到今，文筆、思路猶是真淺薄。散文、現代詩的作品較捷（ciap8）發表佇海翁台語文學雜誌，嘛有發表過蓮蕉花臺文雜誌、台文戰線、菅芒花詩刊、雲林縣臺語文研究學會學報、網路部落格。嘛捌刊登過2006.4.22《台灣日報副刊》，可惜這份獨一無二有咧刊登台語詩的報紙，過無二個月就停刊，蓮蕉花臺文雜誌嘛停刊。2009年11月15日首都詩報雙月刊創刊，對第二期到最近的第
6期逐期攏有我的作品。

台文寫作之路是孤單，會當發表的刊物有夠少，上重要是有寡用字無學台文的人是捎無總，社會上對台文的文學作品嘛是看無目地。尤其是一路行來，在地閣熟似的台文寫作朋友嘛是一、兩个爾，其中一个這久較少寫，前年猶捌出版過詩集，真正是冷淡、稀微。彼位捷捷咧寫的朋友叫「翠苓」，是寫手，是勇跤，伊的詩、散文攏是真情流露，散文作品較濟，得過第一屆海翁文學獎散文組的《首獎》，九十四年雲林文化藝術獎文學組的《優等獎》。阮兩人攏佇互相鼓勵之下，寫作之路猶袂退勼，我出冊無第二个想，就央伊共我寫「序」。自底詩集冊名是欲號做「山櫻的春望」，後來是看著伊有一篇散文叫「美麗的堅持」，想著台文寫作一路行踏，雖然冷淡、稀微，卻是剖腹獻真情，拍死無退，會使講是正港的「美麗的堅持」，有感而發，借用做我這本詩集的冊名。

出詩集自本嘛是無按算，想著「啥人欲看你的冊」就退十外丈，台文詩的高手是濟濟濟，比我寫較好的更加是「塞倒街」，老實講：無欠我這一本冊。今年2月初七，
首都詩報的發行人、主筆潘景新、施俊州來訪問阮「雲林縣臺語文研究學會」，其中
施主筆講著翠苓散文的篇數會使印做二本冊，顧謙的伊講歹勢出冊（其實是貧惰「改字」、整理稿），當時我就贊聲鼓勵伊：「出冊毋旦是你個人的代誌，閣較是咱會、咱台語文學（台文界）的代誌！」講甲喙角全波，嘛喙應我家己會佇今年中出版個人詩集。講話算話，才有這本冊的「出世」！

雖然毋敢自稱是詩人，出冊本身是歡喜的，台文寫作拄滿九年，作品無算濟，詩作袂超過一百篇，選其中八十二篇，算是詩作的成果展。重要的是，每一篇詩，攏是我人生旅途的痕跡，無記持的我，會當對詩內底回顧我的性命所拄著、看著、想著的代誌，留予家己溫暖的思念，此生無啥可遺憾！

人，一生當中會當出冊，就算是真無簡單。若是出的冊是詩集，更加是無簡單中的無簡單。若是出的詩集閣是台語的，彼就真誠無簡單中的誠上無簡單。按呢想，學台文、寫台文的辛苦過程，一夕之中變成做甜蜜歡喜的果實！

詩集出版，會開一个發表會，主要會請上好的親情朋友參加，來分享我的歡喜佮寫作成果！我結婚的時，上好的親情朋友攏有來；這久我詩集出版發表，也希望上好的親情朋友攏會來。因為「無常」，所以珍惜這份美妙的因緣，發表會過了，人生按怎變化，你、我會變成啥款攏袂當意料！詩集附有朗讀的cd，萬不二我百年了後，有人看著我的冊，聽著我的聲、我的詩，有熟似也好，無熟似也好，猶會感受著我對這塊土地的關懷，對人、對事的感情相透，這是何等樣的美妙！

將近欲六十，美麗的堅持，台文的健筆會閣勇敢寫落去，向望有志一同來寫母語的詩、母語的散文、小說。尤其，台語文學雲林猶算一片沙漠，特別需要有人相佮鬥陣來「開天地」，將母語文學的「真、善、美」播種、生湠、予開花結子，滿山滿城百花齊開遍地芳。