產前檢查

　　這是十外年前，我佇下港一間綜合病院婦產科生產所發生的故事，代誌自頭遘（到）尾徦想起來，予人感覺真不可思議佮驚惶，雖罔經過迹呢久矣，即間參空壹病房號碼，猶真清楚記稠咧。

　　現代人講：「一個照書養，兩個照豬養。」，遘背（phāiⁿ；「懷」之意）第三胎，我確實是足蠻皮，產檢攏無照起工。一來是有身了後，身體勇勇仔，抑無啥各樣，二來是想著內診時袸的見笑，閣佮先生有當袸檢查，使用鴨嘴鉗的粗魯，害我見若想著婦產科，著心情沉重、面烏一爿，足畏的。

　　等遘產前一個月，才想著愛來揣一間婦產科，做頭一擺抑是上尾仔的產前檢查，順月麻挺好佇遐生產。因為踉（間隔）足久才擱有身，以前熟識的彼咧婦產科先生已經退休，無卜共接生，我只好擱揣過別間。落尾決定去離阮兜十幾kilo，一个倚海小鎮的婦產科去檢查。

　　即咧小鎮，以前捌暗時來食海產，毋拘我對這倚海的所在，是真生疏。會撿即間病院，是聽講遮較有規模，是一間綜合病院，田庄所在，安呢著算足jou-do（˙ㄖㄡ豆；「優良」or「讚」的日本外來語）矣！

敢是夢中先來巡過？

　　掛號等待門診的時間真久，我四界罔行罔看，看著較過去遐有一个後尾門，我徛佇門邊仔歇睏，一港風微微仔吹來，有淡薄鹹鹹的臭腥味，想著遮，目睭一下擘足金！眼前的景緻，若像昨暝眠夢的所在，眠夢著是徛佇佮遮相像的戶碇，曠闊的停車埕，有昨暝夢中溢來溢去的海湧；想講是家治烏白想，敢是暗時暝夢做無遘，日時擱做來鬥？擱來去別位罔踅啦．．．

　　問櫃檯護士，婦產科的產房佇佗位？伊應我講：三樓。我寬寬跁起里，昨暝的夢境又那浮現腦海，沿路哪會攏迹呢仔熟識的感覺？連婦產科麻是夢中的三樓。樓梯的所在仝款是佇病院大樓的頭前，病院頭前的咕咾石變成海港．．．。我卜來進前，是連即間病院生做圓抑扁攏毋知啊？這．．．敢袂傷巧合？心肝煞切一咧．．．

三更半暝歹物仔來作伴

　　順月嘍～腹肚疼歸暝，透早生產了，愛換去病房歇睏。幾阿个護士共（將；把）我位生產台扛徙（搬移）過另外一个活動推床，一徙過，尻脊胼雄雄像去捂著冰仝款，彼推床足冷足冷．．．冷徦袂輸人倒佇冰角面頂安呢。自底足驚熱的我，連瞇起交崙筍，紲落歸身軀懼懼顫，護士提厚棉被予我蓋麻無效，彼款冷是位推床下底冷起來的，產房遘病房，短短的走廊，感覺真久才遘位，送入去病房了後，彼張推床著夆捒走矣！

　　病房的眠床較燒絡，日時睏傷飽，暗頓過矣，精神猶真好，翁婿講款好厝內工課，等讀冊囝仔睏矣，伊會來陪我。等啊等，暗時十一點矣，人猶袂來，想講我生產麻真順序，生了體力恢復足緊，麻無一定著愛人佇邊仔看顧。伊一个查甫人，這兩工抑卜顧我，抑卜顧厝裡兩个讀冊的，傱來傱去，犯勢比我生囝擱較悿。所以我無喀電話轉去催伊來，予伊好好仔歇睏。

　　塑膠拖門隔間的病房細細間，真無聊擱無電視倘看，好佳在眠床頭有一份報紙，撒來罔看．．．先共眠床頭絞較懸咧，躺（theⁿ）咧看，目睭較袂食力，報紙看毋知外久矣，雄雄目尾去瞬（sut；瞄）著病床邊仔，倚便所壁的鐵椅仔有物件振動．．．．

　　頭越過看，無看無驚，一看心臟強卜跳出來！彼鳥鼠仔色的鐵椅仔面頂全手了了，算袂出有幾隻手，那像位便所的壁伸出來，通光（透光）的手，著像熱天，點仔膠路面有時會看著有澹澹一搭一搭會振動的水，若行倚去著無去；麻真形加油站的油氣通光的波動彼款形體，毋拘即馬看著的是足濟一直伸來的手。

　　透明像氣體的怹，伸過鐵椅仔，椅座仔圓圓一空一空猶原看徦清清楚楚，攏袂去閘著（遮住）。彼歸陣手一直掖一直扒，想卜向我的眠床伸來，著像地獄圖像內底受罪報的亡魂，伸手卜等待救助彼款，其實擱較形卜掠人。

　　我驚徦疲疲趒（發抖），足驚遐的手會伸到我眠床頂，想卜緊共棉被揪（giú）起來崁頭，手煞袂振動，頷仔頸勼（縮）徦無底去；卜喝，發現喙擘袂開（嘴打不開），喝袂出聲，頭殼想卜越爿（轉邊），麻根本無法度徙，歸身軀像予鐵釘仔釘稠咧袂振袂動。彼咧時袸，干單偆（剩下）目睭仁猶會轉，擱有一粒匹啵跳，強欲定去的心臟．．．．。　

　　我足清楚，我是拄著歹物仔矣！

　　為著證明我毋是佇含眠，目睭皮擘袂開，抑儘量予目睭仁踅來踅去，位一細縫看出去，共日時無斟酌看的病房四箍輾轉（四周圍）的裝潢攏記起來，等怹一走，我比對所有刁工（特地）記起來的物件，證實這毋是眠夢。

毋敢擱蹛落去的病房

　　天拍殕光，一暝無睏的目睭才敢微微仔偰（ke）起來。當仔入眠，耳空邊若有聽著一陣一陣嘁嘁嗆嗆的哭聲，心內驚一趒，將按呢精神。聽著來巡病房的護士，佇共隔壁床的產婦講：汝的雙生仔其中一个，有去食著胎糞，即馬佇急救，恐驚仔有生命危險，汝愛有心理準備．．．。原來是伊佇哭。

　　無外久，病房的門又夆拍開，聽著一个查甫人一入來著噢噢嚷，對彼產婦剉訐力譙，講：「ＸＸＸ！汝是按怎生囝的ha？兩个紅嬰仔汝攏愛徦我保證無代誌喔！萬不利有啥乜三長兩短，我看汝這破狸（phùa-bâ破麻）卜予我啥乜交代？」彼婦人人予怹翁詈（la；謾罵）徦越（lu）哮越大聲，歸个病房吵徦（得）厝頂強欲夯（舉；抬）起來。

　　即間婦產科的参空壹病房總共有三个床位，病床之間干單用一个塑膠拖門隔咧，準講看袂著猶有別人佇歇睏，麻應該知影才著！毋拘，會當了解怹現子時的心情，著忍稠無徦喝。尾仔彼查甫人實在真超過！煞佇病房行出行入，門拍徦乒乒乓乓，三字經五字經無離口，我支載袂稠矣，落病床直接傱去護理站櫃檯遐，叫護理人員來處理，無癮（gian ; 願）了精神共怹喝，莫加衰煞換我予彼查甫人喧（ sōan）！

　　護士來苦勸怹了後，吵歸早起的病房，總算惦靜矣。怹翁一走，伊想著心酸，擱開始嘁嘁嗆嗆。我輕輕仔將拖門拖開，安慰伊～作月內的人毋倘哭，抑無後擺目睭會無好，這是老一輩傳落來的講法。聽著我安呢講，伊頓（tìm）頭無擱續落哭，病房即袸惦寂寂，毋拘我的愛睏神麻走徦無看影矣．．．

　　本成按算生這胎卜蹛院靜養較濟工咧，倘好彌補進前兩蓋無做好的月內，佇遮，紅嬰仔有護士會照顧，產婦毋免一直跁起跁落飼奶，腰脊骨會使顧較勇，麻睏較有眠。哪知「千算萬算，毋值天一劃」，想著昨暝歸暝看著歹物仔，佮今仔日隔壁床發生的代誌，雞母皮猶颯颯叫！這兩項代誌敢有牽連？無人知？！蹛一暝爾，干單想卜緊辦出院，緊來阿婆仔踉港較直！