鹿仔母即咧時陣來夠草埔頂，伊踏著芭蕾舞者赫爾輕快的跤步，佇遐來回塊趒跳，伊誠歡喜欲開始享受一頓腥臊的早頓囉。鹿仔母延路行延路食，不知不覺行夠一欉綴著風咧跳舞的菩提樹樹跤，佇蓊蓊的樹影下面，伊看著一簇生做誠嫷的草菇，親像小姑娘仔舉一支嫷嫷的小雨傘，一支一支；有黃的、有紅的、嘛有咖啡色的，哇！奚則是世界讚的好滋味啊！

鹿仔母內心誠歡喜，伊按算用喙共咬轉去，予迄兩隻可愛的心肝仔囝，享受一頓腥臊腥臊無共款的中晝頓。

伊道拄則行夠樹仔跤，準備欲用頭前跤共草菇挽落來的時，突然間，「轟隆！」一聲，鹿仔母已經落落去一個烏暗的陷阱裡底。啊！天公伯啊！鹿仔母的早頓都亦未食飽，就落落歹人的手頭矣！

鹿仔母流著目屎，心內誠失望講：「唉！是欲安怎咧？我家己予人掠去無話講，毋拘，我的囝欲安怎？我的囝欲安怎．．．？」

伊共耳仔拸[thi2]真開，牽腸掛肚想著遠遠的所在，假若聽著心肝仔囝枵甲咧喝阿娘的聲音。鹿仔母的心肝碎去矣！碎去矣！．．．。

食中晝頓的時間夠矣！鹿仔囝的腹肚咕嚕咕嚕地嚎：阿母汝那亦毋轉來？

日頭伯仔已經行夠天中央頂懸矣：阿母那會亦無轉來咧？

兩隻鹿仔囝恭恭敬敬跪佇塗跤，戇戇仔佇遐聽候怹阿母轉來，怹想講阿母若轉來，道會使啉著清涼擱甘甜、親像露水迄款清芳的奶水矣！

風一透來，樹頂的樹葉親像一隻擱一隻悲傷的蝶仔（iah8 a2），在來悠美的舞步踏亂去矣，佇樹頂綴著風透滾絞一睏、擱吐一下大氣，則落落來佇塗跤，像替鹿仔囝咧悲傷。

鹿仔囝一擺擱一擺共耳仔拸開，聽候阿母倒轉來的跤步聲。毋拘，一擺擱一擺攏等無阿母倒轉來，等著的，是樹葉一聲一聲的替怹哀怨的淒涼！

欲暗矣，鹿仔囝干礁會當目睭金金看著日頭伯仔坐著金色的馬車，駛唯西爿的雲內面轉去。一粒像鏡赫爾仔光的月娘唯雲當央行出來，咦！奚敢毋是阿母慈祥的面容？紲落來，天星嘛閃閃熾熾跳出來矣，咦！奚敢毋是阿母嫷嫷嫷迷人的目睭，親像逐暗搖怹入夢的時陣仝款，眼神充滿慈愛咧唱著搖囝歌──「呦呦呦．阿母．．．阿母．．．。」

唯早起到暗時，鹿仔囝就安呢輕輕仔叫著怹心愛的阿母，一聲一聲叫無歇睏，叫聲悽涼閣驚惶！「呦呦呦．阿母．．．阿母．．．」