接受簡素津老師點名:自然生態七日觀察（連續七天，記錄自己現在或是曾經拍攝的照片）。

第一工：深情看花看樹 ─ 東勢林場金櫻子

滿山花、草、樹、葉，毋是先生採無藥。原來媠甲像仙姑下凡的櫻子是中藥材，真正是「烏矸仔貯豆油」，看袂出。

青青的葉仔參白晰晰的花、金黃色的胚珠，真四配。天地闊莽莽，有日頭有月娘，有山有海，有人有動物，有花有草，有樹有葉，有五穀有青菜，真正是稀奇、豐沛閣趣味。

我講伊像仙姑，是伊花枝有細細的刺，會鑿人，袂使「有花堪折直須折」，干焦會使欣賞，袂使動手挽。伊出身寒門，佇拋荒偏僻山野石頭的所在，儼硬倔強開枝散葉。種子是金黃色，藥用固精、治厚尿、治落屎。

花按怎開按怎謝，水蛙按怎叫，吉蠳按怎吱，攏有伊家己的跤步佮節奏，大自然的生物怹活甲足自在，有人類的盤撋無較好，有較 bái。人類對大自然放雞屎有，放雞卵的無！

金櫻花講：「我是為家己開的花蕊！有人講：我是為怹開的花蕊

，有影是五四三，阿媽生孫—公（講）暢。」