【兜个島嶼】客語現代詩(四縣)／錡亮

自前朝下後，物價緊起
盡像溫度計裡背心躁躁个水銀
海島跈等烏箱个氣溫飆高
社會總係敨氣毋得个低氣壓
民怨漸漸仔堆打堆，拋拋滾

若兜咧，山林壁角个隱士
還本本樂線好講笑
將政治、經濟、拂到壁角

總督府裡背，政客還在口涎波沷
抽胲另命在該位做秀、搶版面

首都个衙門頭前
逐日聚總無共樣个抗議團體
高高擎等各種訴求个標語，喊出口號
佢兜其實同若兜無差別

共樣吵耳吵鼻，聲哨摝人
毋過這係民主社會，無論在朝野
做得大嫲聲胲、放勢講

心肝頭無歡喜，只愛毋係
儘採哯痰，無麼儕个權利會消忒

服貿，正經愛恁認真，恁出力？

計較資源仰般分配
政商分較多个油水？
另力喊出自家个主張？

該兜政客，毋係輒常沙鼻摝天？
無勢好靠時，就等等走路
講著這兜恬恬个老百姓
像機能退化个蟬仔
食得睡得，除忒打噎啄
兜恬恬思考同體會
雖然，兜無法度羽化
聽講權利會分人生出翼胛
毋記得自家个身份，摎蹶上山峎个過程
毋過還較多个時節，權力嗄變成
抗藥性夭壽強个細菌，漸漸仔害人壞淨淨