大家緊來看卡通喔！用畫嘛會使字卒，精彩度隨哉你扑分：

《文字描繪的意象卡通》——鵝參鴨拼纛

規陣鵝仔搖搖擺擺、囂囂俳俳，踅過來晃過去  (音ㄒㄩㄝˊ；往來盤走)

鴨仔群看佮目赤空，開喙咿咿呀呀、操幹落譙

隨前又追後，按算參鵝大車拼佮武一場

水池仔邊佈陣展開，聲勢諕小夠吵死人  (音ㄏㄠˊ—ㄒㄧㄠˇ；矇騙)

遮屏鵝仔老神在在，身段優雅袂輸道仙

毋愛睬小對方躍武揚威，滑哉怹展威凜

彼搭鴨仔惦水一屏，相招豬仔囝鬥參共

歐里桑發覺毋是勢，撾一支竹篙趕鴨陣  (音ㄙㄚ；抓)

有主人相挺蓋風神，鵝爽甲尾椎翹袂停

阿桑惦佇邊仔看著蓋受氣

喝豬仔毋睏走來鬥鬧熱：

「沖啥咪碗糕，攏佮您祖媽死返豬槽…」

豬仔無辜乎人罵，頭蕊蕊細聲應喙應舌：

「嘛干焦看鵝鴨相拼纛，有遐呢嚴重嗎？」 (音ㄍㄢ—ㄉㄚ；僅只)

歐里桑喏趕喏參阿桑罵作夥：

「攏嘛你啦！正港寵豬舉灶，果然不錯；

今仔日豬仔知食毋知做，遮會閒閒興趣看相扑，

賭爛恁爸明仔載送去豬屠口，省我逐工要舀潘。」 (音ㄆㄨㄣ；餿水)

《自我安慰畓畓唱》

落魄時捌瘦甲存一支骨

落難時漂浪他鄉毋晟樣

遭遇仝款但是無仝師父

攏造成阮一生中的遺憾

記記在心，藏永遠的慟

吃苦當吃補拼出生死門

＊                  ＊                  ＊

有破ト子通嚼鹹抑算福氣

失戀食金蕉皮撾耶烏白治

當刻苦是過程中一個崁站

無必要對人生來失去信心

踅一輪返誠緊連鞭就歸天

計較是家己無端折磨家己

(註)  1. 畓畓：此處台語唸ㄉㄠˇ—ㄉㄠˇ；音義慢慢

           2. 捌：音義；曾經

           3. 破ト子：一種醃製的鄉土食品

           4. 崁站：段落

           5. 誠：非常

           6. 連鞭：音義；很快