https://youtu.be/vdSSFwkPr40

《無奈的宿命》

詞曲、編曲：輕輕
攝影、小說：輕輕

輕輕版權所有，嚴禁轉載抄襲，違者必究。

　　人與人之間存在著緣份，但究竟是啥人佇咧決定人與人之間的緣深緣淺、緣起緣滅？

　　「媽！」阿娟帶著期待的眼神：「阿爸底時會倒轉來？」

　　「下禮拜！」蔡美華並無以往歡喜的心神，也看不出一點哀怨。面無表情，親像大風大浪過後的海面，親像欲倒轉來的人只是一個過路人──來了後，橫直會倒轉去。

　　無是欲按怎？十二年囉！應該哭的目屎攏已經流乾。美華的尪婿林清文十二年前乎公司派去上海出差做台幹，本來夫妻兩人甲伊當做是普通出差，公司也允成一、兩年内甲清文調回台灣。結果呢？規間公司一年後就搬去上海，叫清文欲按怎轉來？

　　這年頭揣一份頭路無遮簡單，清文也無可能放捒伊這份好工課。

　　不而過夫妻分隔兩地本來就毋是啥好代誌，我嘛有打算搬去上海蹛。但是我彼間辛苦經營的店仔舖欲按怎？鎖鎖起來喔？關門鎖店是小代誌，阿娟的學堂呢？送伊去大陸讀冊？讀了會變啥款？我較不敢想！只好等阿娟考上大學後較講！

　　這陣回想起來，頭一、兩年正歹過，啥米「小別勝新婚」，頭殼攏歹歹去！食飯時，飯桌少一個人，食肉還是食菜已經無啥米好爭論！橫直一頓飯袂超過十分鐘！晚暝愛睏時，枕頭仔邊少一個人，桌頭燈攏嘛毋敢禁，乎伊一暝開到天光，目睭嘛一暝開到天光。

　　三年前電視臺好死毋死，搬啥米「牛郎織女」，無恁是欲乎我哭死喔？我甲清文毋知底時煞親像牛郎織女，每年剛剛見一、兩擺面。話講倒轉來，有見面總比無見面好。有見面彼份情份猶閣咧，上驚是斷線的風吹，一去不回頭！袂啦！阮清文袂做這款僥倖的代誌。

　　下禮拜阮尪就欲倒轉來曪，昨暝甲伊通電話時，伊閣再提起講欲帶阿娟去大陸，問我欲去無？我乎伊氣甲規腹肚火！我甲阿娟是一體的，伊若是欲強強叫阿娟去大陸，我當然是做陣去，有啥好問？莫非阮尪佇咧試探阮的口氣？伊欲甲阮分手？

　　聽真濟人咧講，查埔人去了大陸攏會「包二奶」，講啥米這是「天下男人都會犯的錯」！唉！希望阮尪第好莫犯這款錯！

　　正煩，聽歌：

　　女：牛郎

　　男：織女

　　合：苦命的兩人

　　男：暝日隔海相思

　　女：毋知何時終止

　　男：無奈的宿命

　　　　欲按怎看破

　　女：命運的創治

　　　　注定要分離

　　男：你是叫我欲按怎

　　　　我對按怎來咒誓

　　女：我對你並無疑猜

　　合：只怪你我隔東西

(全文完)


>> 臉書連結

※祝大家七夕情人節快樂~ ^_^