野薑仔花脫塵的芳氣

雲林故事館後埕的野薑仔花前幾天開了一蕊，隔工就謝去，毋過邊仔閣暴一蕊，清芳味溢踮鼻空內，彼種高雅的清芳，真少有法度比並。

遐，倚牆仔邊有幾若欉野薑仔花，攏是牽手唯外口移徙來的，每工透早來故事館做運動，別人掃地，我就負責沃水，照顧後埕的花草。

野薑花開啊，一年干焦一擺，干焦這欉有開過，開的花一工就蔫去，莫講「花無百日紅」，一日紅就真困難，敢有影是「紅顏薄命，好花緊謝」？

人講「時到花便開」，認真的照顧，時節因緣若到，花自然就開啊！花開花謝攏是性命的傳奇，盡本份就是完美。

認真開的花上媠，野薑花的清白，野薑花的溫純，動人的身影我共翕落來，不管時回味伊脫塵的芳氣。

話尾..昨發覺共彼葩椏閣暴出三、四蕊含苞的野薑仔花，今日己經開甲真美麗。