人愛事磨才會圓，事愛人做才會成

古早古早的銅錢外箍是圓的，內面是四四角角，是教咱：做人愛四正，愛照紀綱，該當按怎做，就按怎做；無應當做的，就絕對毋做，這是對家己的要求。

做人愛保持四正的原則，毋過，做代誌就愛講究方法、效率，會當莫得失人，空課閣會完滿，這才是一等一的。人攏是經過一擺過一擺的磨練，世事的耐拍撋，才發覺做代誌的方法袂使四四角角，愛會曉變竅、變通，才會當共阻擋的力量變成做助贊的力量。這時陣，性地也好，做空課的鋩角也好，就會圓圓圓。世事就是按呢生，靠咱人用心拍拚去完成。