性命的過程，真濟毋是願意的，亦是無可奈何來發生，據在彼個無可測度的因素咧舖排。這個無可測度的因素，想無，嘛真歹了解，只好講是「天意」！既然毋是咱所欲愛，代誌的發生必然有伊的道理，算是上天的安排。就像大自然的色影，有青、有白、有黃、有紅，咱扮演啥乜色彩，變做啥乜色彩，雖然有伊基本的原素，嘛有暴憑（突然）變化的原素。

         世間代真複雜，有時天會無照甲子，有時是咱會當主意。咱會當主意的，咱盡家己的力量，未當主意的，就算是天意如此。是天意，任憑伊主宰，咱的責任只是好好仔盡本分，好好仔過每一工。俗語講：「歡歡喜喜嘛一工，煩煩惱惱嘛一工」，閣較艱苦嘛未使餒志、面憂面結，反倒轉來愛歡頭喜面笑予天公伯伊看。

         病的疼、病的苦、病的悿，是病的過程，總會結束。毋甘汝受苦，佇遠遠的所在祝福汝平安。汝若問：「欲安怎度過難關？」我干礁會當講：「只要汝靜落來，心甭急，汝會揣著出路。」