丈人滿七

下晡下班經過一戶喪家，孝女白琴花車的放送頭霆出哭阿姊的叫聲，聲淡薄仔淒涼，我的心頭一陣酸疼，因為丈人爸明仔載就滿七，四十九工佇真無閒當中真緊就過去。  

因緣若好，代誌就真巧妙。丈人爸佇台中病院加護病房，家屬簽了無欲急救、無欲切喉管的同意書，家屬心內攏有數，丈人往生的日子一日一日逼近啊！

毋過，家屬向望丈人別世的時間莫佇查某孫嫁娶進前，我是祈求伊往生的時間毋通佇三更半暝，因為請蓮友來助念有困難。誠拄好佇查某孫嫁娶了一禮拜正正的透早伊來別世。

七月十五的透早，我已經準備出門欲參加兩工的土地關懷營，牽手嘛拄欲出門去高雄辦代誌，電話一鈃心內喝講害嘍代誌到手矣，其實即兩三禮拜來，聽著電話鈃心內就著一驚。是佇台中護理之家照顧丈人的姨仔拍來，悲傷聲調講出：「阿爸去啊！」隨就哭出來！阮隨取銷行程，好得佳哉阮兩人攏猶未出門。

阮唯虎尾趕轉來斗南，姨丈嘛唯台中趕轉來準備，姊夫阿姊嘛到位，逐家將客廳的椅桌搬徙，舖板用六條椅頭仔疊起來，舖板頂舒〔chu1 舖〕毛巾被，丈人平時睏的枕頭嘛囥予次序好適，客廳佈置西方三聖香案。過了半點外鐘，救護車才轉來到厝，姨仔鬥扶丈人落車，伊規面像予目屎糊過，逐家傷心的情緒浮上心肝頭，忍椆椆毋敢哮出來，驚目屎滴落予丈人愈毋甘行未開跤。

將阿爸輕輕囥落舖板，將病院的衫仔褲換起來，我共丈人爸講：「阿爸，汝轉來到厝啊，逐家攏佇汝的身邊，汝病苦迹久，即馬就無病苦的束縛啊，汝有皈依三寶，嘛有咧念佛，愛知色身較久也是會歹會害去，像一台破車未當修理，就愛掞掉重換一台新車。今仔日汝別世啊，參即個世間的因緣嘛告一段落啊，即生任務圓滿，愛念佛來去阿彌陀佛光明的世界，去遐就變成蓮花化身，就無生老病死的痛苦，佇遐有佛菩薩教咱修行，有一工就會花開見佛悟無生。日後咱攏會佇蓮池海會閣相見，汝免掛意阮逐家，阿母阮會好好仔照顧，汝愛參阮逐家用心念佛，請佛做主，帶領汝去極樂世界，來！念佛，念阿彌陀佛，阿彌陀佛……….。」

看姨仔忍未椆，覆佇壁牆艱苦甲強欲昏去，念佛的聲音提醒伊真緊拭去含踮目箍的目屎，參阮號齊念佛。逐家情緒安定落來，我上香向佛乞求哀佑加庇：「願我岳父張○○臨終無障礙，彌陀聖眾遠相迎，迅離五濁生淨土，迴入娑婆度有情」。

唯早起六點外開始念佛，一點鐘後助念團的蓮友來助念，家屬若悿會使小可歇困，才閣做伙念，助念團的蓮友念一點鐘就有另外一班來接班。到下晡三點外，念滿十點鐘圓滿，助念團的蓮友排了九班，有五十外人來助念，真感動。我佮牽手是助念團的幹部，平時對助念團、對助念嘛嚨誠認真，一方面嘛是丈人爸伊做人和爽，人人好的個性，這是伊的福報，自然得著好人緣、好助緣、好法緣。

舅仔嘛佇中晝也唯台北趕轉來做伙念佛，助念結束逐家鬥相共佈置靈堂，進前桌仔、巾仔、物件已經僎好勢，排排疊疊咧，牽手負責插花，靈堂佈置甲真溫暖莊嚴。

暗頓了後，家屬開會討論後事按怎發落，丈人爸頭腦猶未退化進前，是無愛火化（阮丈姆嘛是無愛火化），後來頭腦小可退化，人閣精精的時，牽手捌問伊，伊講：「好啦！隨在恁變〔pinn3〕！開較省咧就好。」十外年前，我父母抾骨去斗六引善寺進塔，看引善寺是修行的道場，每年攏有佛七，寺眾人嘛未少，郊外風景真清幽，我真合意，參牽手參詳了後，用丈人、丈姆的名義訂兩個塔位，本成想講假使怹無愛，就予阮兩人用，亦是丈人較有福氣。

奠禮照丈人的意思甭開傷濟錢，用簡單、隆重來辦理後事。簡單是陣頭無濟，佛事改做靈前誦經，隆重是用心誠心來做，重點是禮堂佈置予較莊嚴無凊采，骨灰甕仔選阿富汗的青玉，靈車是加長型的凱迪拉克轎車。一般喪事處理，家屬上驚予人議論傷凊采，好親像如果無鬧熱，無開真濟錢，對序大人是無有孝。丈人個性廣交，愛鬧熱，愛面子，阮配合伊的個性佮交代，省省仔開，儉儉無浪費，甭損福。因為阮翁仔某捌共蓮友鬥處理喪儀的代誌，後事的空課包括式場的佈置大部分是阮翁某來走傱，連司儀嘛是由我擔任，守靈就予其他的人來做。

助念團的成員有家屬往生，攏會閣去誦經三擺，牽手閣參加龍善寺念佛會，怹嘛會來誦經三擺，我安排逐工有人來誦經，我家己閣請善覺精舍、慈德寺師父來誦經，虎尾寺、智覺寺師父聽著消息，嘛主動來誦經。平時仔阮參寺院攏足熟，只是毋敢勞動法師。無欲做佛事，是考慮天氣熱，厝裡做，聲音大會吵著厝邊隔壁，尤其佛事淨資是一筆未少的錢，舅仔、丈姆怹並毋真純的佛教徒，恐驚有長短跤話。閣想講已經接近農曆七月，各寺院超薦法會真濟，到時才參加就好。七七日內，參加了足濟位寺院的法會，嘛有阮助念團家己辦的一年一度的孝親報恩超薦大法會。

這段時間有寡感想佮記事：

一、丈人中風了後，定定就想欲轉去「小東」，小東是斗南的庄跤，是丈人爸出生大漢的所在，雖然無舊厝佇遐，伊猶原誠數念。本成按算出殯了後想欲去小東踅一輦，通好滿丈人的心願，那知影喪事愛經過庄內的廟仔先去通報，煞回講：「驚庄內無平安，無歡迎出殯踅入庄內」。不得己，出殯的車隊特工經過庄外大路，雖然無入庄，車駛慢慢仔，一方面共丈人講轉來伊、經過伊思思念念的故鄉。我想伊的神識也當自由來去，會踅轉去伊熟似的所在遶遶一下！

二、靈堂佇亭仔跤，因為厝比路面懸真濟，亭仔跤到大路有一個崎度，外口搭一格布帆，彼個趨嶇仔煞無平，未通排椅桌，空間變獈，蓮友欲來誦經，攏特工吩咐：「人毋通超過二十人」。天氣熱，人坐甲滿滿窒淀，汗流汁滴，對蓮友真歹勢、真失禮。毋閣，奠禮的時助念團蓮友來四十六個人，家奠進前，怹就來念半點鐘佛號，閣參加到完滿，送靈車出去，心內真感激。

三、牽手是慈濟委員，阿爸嘛是慈濟的會員，丈姆年歲濟時常抾回收的物件捐予慈濟。慈濟的朋友嘛有五十人來參加奠禮，公奠的時嘛會念十分鐘的阿彌陀佛。奠禮的時，才想著大林慈濟病院拄欲起好，牽手共丈人講病院欲化緣病床，丈人真歡喜一聲就講好，當時對無咧趁錢的丈人，奚是一筆未少的開支，伊肯施捨，看出伊的善根，自然有伊的福德。

四、佛教無燒金紙，認為淪做鬼道才用會著。臨終了後，助念、誦經，是欲愛亡者行向西方佛國或者光明的善道。可惜，家屬一方面愛伊去西方，一方面閣驚伊無所費，就愛燒銀紙、燒庫錢，閣就愛燒真濟才有夠額，兼閣愛燒紙樓仔厝、紙轎車、紙電化製品才甘願。牽手慼人燒足濟的銀紙，逐改祭拜、做七攏嘛燒足大堆的金紙，伊若看著面仔攏膨獅獅，我勸伊講：「各人想法無仝，怹用按呢表示伊的有孝，咱用供養、佈施、念佛來回向表示有孝，甭稽考。」

五、出殯的前一工，拄著今年第五號颱風凱米，我虔誠求佛保庇，予奠禮真順利完成。彼暗半暝一陣一陣的大風，布帆搭的式場強欲予風掀掉去，三更半暝斗南閣敲電話來，趕緊叫搭布帆的頭家去加強。我敲電話交代厝裡，萬不二式場布帆擋未椆，將插的花徙入來亭仔跤，明仔載最起碼嘛有物件佈置臨時的式場，時間看好嘍敢會使延，明仔載若透風落雨做風颱看是欲安怎？誠擔心。佳哉，式場無去予風颱掀去，天光奠禮進行，攏烏陰無落雨。啊！有燒香有保庇，蓮友加親情朋友嘛有百外人，誠鬧熱，誠莊嚴，阿爸一定誠歡喜才著。

                後來大姊去引善寺參加法會拔薦、佇往生壇跋篦（擲筶），問丈人對喪禮進行敢有滿意，講博無杯，厝裡的人心肝就礙謔礙謔。阮牽手毋信邪，隔轉工閣去跋篦，問丈人爸對阮逐家按呢處理伊的後事，伊敢有歡喜，允〈in2音〉想篦！

六、丈姆講：「出殯的時，無啥陣頭，無啥鬧熱。」牽手講：「行無誠百公尺就上車，愛赫濟陣頭欲做啥用？汝希望閣有啥陣頭！」丈姆恬恬無話，阮想無欲閣有啥陣頭。後事也欲省也欲豐沛，欲愛俗閣愛大碗閣滿墘，敢有即款的代誌？咱的後事過程足複雜，加上即久序細生誠少，喪儀的代誌全嘛予喪儀社來包，每一人的喪事攏是按呢辦，最少嘛愛十外萬，有法度閣較省嗎？

        一代高僧廣欽老和尚，講了最後一句話：「無來也無去，無代誌」，實

在是真瀟洒、嫷氣，咱是「有來也有去，全代誌」。萬一臨終彼工若到，敢

會充滿平安、歡喜？咱欲行向何處？咱敢有準備妥當？

        萬不二我欲來轉，請恁毋通為我傷悲，請汝為我念詩，念我上熟似的台語，我會將汝的詩貼踮西方蓮池邊的涼亭裡！