紅豆餅台語按怎講？
頂禮拜讀冊會羅老師提出問題討論，我將部分內容參個人看法分享，請指教！
1.盤仔、撇仔（撇.本字是石＋匹，電腦無字）： 照洪惟仁老師《台灣北港方言》：台灣中部以北無phiat4- a2（撇仔）一詞，中南部以下多以「盤仔」指較深的盤仔，北港無論深淺攏叫phiat4-a2
2.膠水：水膠
3.紅豆餅：車輦(lian2輪)餅、栱(kong2)仔粿
4.單槓：栱（kong5 樑木）鞦或鞏鞦、竿鞦。囡仔念謠：吊
鞏鞦，生喙鬚…….。
5.扯鈴：扭鈴仔，扭空竹（見公共電視台下課花路米）。扯：文：chia ㄘㄧㄚ。白：che2ㄘㄝˋ，扯無輸贏，扯平，扯後跤。扯消（一筆勾銷），扯（絕交），掩來扯去（平均計算）。
教育部國語辭典：【空竹】用竹子和木頭製成的玩具。兩端有二圓盤，中有橫木，以繩子繞圈，再抽拉在地，即旋轉而嗡嗡作響。或稱為「空箏」、「空鐘」。
6.甜粿好矺（壓）年、發粿會發錢，包仔粿包金，菜頭粿食點心。包仔粿包金，指食包仔會金銀滿大廳，富貴的意思；另一種講法是食包仔目睭金。
7.掀新娘頭蓋：秤仔
鹿港民俗文物館展示的舊式房舍，有嫁娶的洞房，洞房
內會當看著一個提秤仔準備掀新娘頭殼崁落來的紅紗仔巾
的新郎像。用秤仔掀崁頭殼的紅巾仔，涵意可能是提醒新
娘此後愛「知輕重」的意思。遮的輕重是指「事物主次、
緩急的程度（史記˙卷62.管晏傳：貴輕重，慎權
衡。）」。
11樓. 溰禕（寂靜止語）2006/08/31 12:15感恩
感謝居士無氣嫌阮黑白寫寫兮
真濟毋捌的所在愛請您多多指教
深居竹廬 . 靜聽清流
10樓. 虎尾許居士2006/08/30 16:44請逐家來寫台文
請汝佮逐家做伙來寫台文..寫未出來的詞先用華語代..才來互相探討..-
9樓. 溰禕（寂靜止語）2006/08/30 14:55棚跤徛久睏去矣
33：
汝講『棚跤徛久睏去矣』麻無毋對
阮受華語兮薰染（遮兩字台語卜安怎講？）傷深
致使講一寡北京台語
家己遂無感覺奇怪
敢是心已經睏去矣
自從看到恁大家佇寫台語文
阮攏袜曉，深深懺悔
連家己的母語道放袂記兮
卜毀滅一個種族兮文化
先毀滅伊兮語言是尚澈底甲殘忍兮手段
想要恢復需要外濟工情阿？
深居竹廬 . 靜聽清流 -
8樓. 溰禕（寂靜止語）2006/08/30 14:18失禮，請原諒
33：
阮麻無受過日本教育，是家己有興趣，加減仔學爾爾。
我即本小字典佇まんじゅう後面隨接落寫マンジュ－，是我拍字兮
時袸無看字典家己直接共拍作片仮名（片假名），猶擱共「ジュ－」
拍作「ショウ」。迹尼大的錯誤，難怪無郎看有。
字典內底佇日文解釋了後，道寫 a bean jam bun（即豆沙包），因為
一般用片假名是代表外來語，迹麻有可能是我憶了毋對。即本字典是日
本人編輯兮，為啥寫作片假名，我道想無囉。
另外是佇迹字下跤，有一字マンシヨン是位英語兮 mansion 來的，是
公寓、大樓的意思。真歹勢，我拍毋對字，引起濟濟的誤會甲麻煩
，愛參大家會失禮。
台語參華語兮牽連麻是有，阮幾落十年無講台語，今馬對頭重拍起
，若無卡細利耶（特別注意），阮會甲「特別注意」、「重新開始」
讀作台語音就準煞矣。遮是阮受華語影響的關係，敢毋是。即款
的例，應該也擱真濟（台北腔會講作誠最）。以番茄來講，阮存細
漢攏叫作トマト（tomato），到旦麻毋知影台語卜安怎講，拄著阿
山兮著講作番茄。落尾搪著南部來的郎，講是柑仔蜜，予阮想歸晡，
毋知是啥，真正無法度甲番茄佮柑仔粘作夥。
恁兜蹛佇中部，阮一向佇台北，恁阿爸佮阮阿姊攏一聲道知影
たいこうまんじゅう是啥貨。可見古早確實有安呢講，阮阿姊有講彼是
卡早兮土話。無定著南部郎道毋捌聽過たいこうまんじゅう。道親像英語
麻有地方上兮精差，拄迹講兮 mansion，佇英國佮日本是公寓、大樓，
共遮字傳去美國，是指豪華住宅，像比爾蓋茲因兜道叫作 mansion。
阮選名兮時，抵抵仔開始學拍字，愛揣尚簡單注音兮，猶擱無愛依依
伊伊彼種黏黐黐兮字。揣兩字看起來順眼道好矣。
深居竹廬 . 靜聽清流 
7樓. sann(33)翠苓2006/08/29 10:31棚跤徛久睏去矣
溰禕：日語我是外行的啦！
我即本字典パン的解說嘛是講麵包
但是揣無マンショゥ
干單有まんじゅう
可能是即本字典認為即字是怹日本人的矣
所以無用外來語咧用的片假名マンショゥ
我是為著愛聽日本演歌，所以共日語50音學起來
學起來以後問題濟濟
定打電話轉厝問阮阿爸
有一擺轉外家，又閣問起日語的問題
阿爸講若有一本字典，基本的疑問道有法度解決
阿爸隨教我按怎查
轉來了後去買一本日華辭典．．．
棚跤徛久是人的
足奇怪，我猶未揣著華語參台語有牽連的所在．．．．
敢是棚跤徛久睏去矣．．．
我是看汝佇居士遮解說紅豆餅寫的たいこうまんじゅう
嘛是打電話轉問阿爸
像汝阿姊按呢，一聽道知影我咧講啥物件
朋友講我叫33伊卜共我寫做刪刪….共我刪除掉…
攏會使職啦！因為這是一個代號爾爾
會號做33，開始是因為電腦鍵盤的位方便揑
嘛是因為我高中的號碼是33號
後來發覺我定會去用著3
像講我真愛我的3姑
阮阿母嘛是夆叫3姑
阮兄弟的囡仔嘛叫我3姑
嫁人煞變做人的3嬸、3嫂、第3心婦.......
………………-
6樓. 溰禕（寂靜止語）2006/08/29 02:27請借問
發表下跤遮段回應了後
心肝直直想講毋知會共交代毋對冇
思前想後翻袜伸車（不能釋懷 ）
猶擱倒返去 phián （找/翻）彼本小字典
bun 兮發音卡倚 パン
毋擱 パン兮註解是 bread
是長長切片作土司 (toast) 用兮彼種
毋知33兮日華字典內底是安怎講
敢會是阿本仔麻番番
火車叫作汽車
汽車變作自動車
向望有前輩甲阮指教
深居竹廬 . 靜聽清流 -
5樓. 溰禕（寂靜止語）2006/08/28 17:37愈講愈有味
33 敢是姍姍兮14
聽著誠親切
感謝汝出來解釋
阮干單用一本誠簡單的日語日典
說明攏用日文卡濟，參一屑仔英語，加在有漢字
看無兮時袸著也賽半用憶兮
我提起來講兮「張り合うこと」，開合的物件
甲汝講的【對向】應該真倚意まんじゅう算是外來語
位英語兮 bun 借用過來兮
本成是寫作 マンショゥ，卡倚麵包兮款
內底攏有包物件，所以叫作包仔卡合
棚跤徛久是郎兮，用久矣外來語麻變作家己兮
我憶是因為まん音甲「饅」字相共，就変作饅頭去囉，實在毋是饅頭我一個佮阮阿姊問起 たいこうまんじゅう
伊一聲即知影阮置講啥乜貨
遂落著問我是毋是底咧思念遮項物件
我想伊真緊著會買來予我呷
深居竹廬 . 靜聽清流 -
4樓. sann(33)翠苓2006/08/28 14:19栱仔粿提來．．生日快樂
最近發覺咱台語參日語有真濟的牽連，足趣味的
真濟日常用語原來攏是日本時代留落來變做台語咧用
たいこう即字，佇日華日典內底有七個用法
其中有一個是【對向】，解說講是對著、相對、相向。
溰禕講頂下兩爿合起來，我想道是【對向】即個解說吧！
まんじゅう【（饅）頭】
寫是寫饅頭，參咱遮無包物件的饅頭閣無仝，是咧講豆沙包。
にくまんじゅう是肉包子．．．
紅豆餅已經毋是干單包紅豆爾；有奶油、紅豆、鹹的．．．所以阮為著方便攏講栱仔粿．．．．
拄唯庄跤搬去台北彼年，阮小弟仔則國校四年爾，庄跤囡仔阮毋捌做過啥乜生日，佇台北看厝邊囡仔生日時，雞卵糕頂頭點蠟燭唱生日快樂的歌。
年尾伊家己生日，偷偷仔去買一個栱仔粿，覕佇邊仔點一枝蠟燭細細聲仔唱「祝我生日快樂」．．．．．．即馬回想起來，生日快樂的歌聲內底，有初入異鄉的苦澀．．．．。 -
3樓. 溰禕（寂靜止語）2006/08/28 12:34
2樓. 綠荷2006/08/27 21:21紅豆餅 佮 雞卵糕
阮台中東勢遐攏講"紅豆餅" , 無講"車輦餅", 今兮攤頭刊板 , 我看攏寫"車輪餅".
溰禕汝所講兮,是毋是傳統兮雞卵糕, 細細塊
有兮有包(餡),有兮猶有形體(造型),像日本"人形燒".
汝講兮迄款 , 佮許居士即馬講兮"車輦餅"毋仝 , 烘"車輦餅"是免崁蓋喔!日本人形燒
台灣傳統雞卵糕
紅豆餅 ( 車輦餅 )
