喺7、80年代，出現過好多唔同類型嘅漫畫題材，這些題材又逐漸地出現咗各個代表性嘅漫畫家，武打書有黄玉郎、上官小寶、馬榮成，鬼書有漢民，愛情故事有狄克、劉雲傑，而搞笑港漫始祖就一定係上官小强。
不過小強喺未畫代表作搞笑漫畫"壽星仔"之前，出過好多細書，內容大都係一本正經、拳拳到肉嘅打書，反黑小太保系列，就係類似小流氓般幾個兄弟合力儆惡懲奸俠義故事，內容簡單直接無花巧，而小强以"狄龍"為筆名嘅2毫細書係比較少見同早期一些嘅作品。