阿娘坐椅條

雙手縛肉粽

一粒一粒愛

五月粽飄香

  吃著外面買轉來的肉粽，按怎香嘛無親像阿娘的滋味。

想起細漢的時陣，厝邊隔壁，親戚五十，伯母仔、嬸仔 

、少年姨仔，早早就相招作伙來縛肉粽。

   天未光，狗未吠，一透早就起起鏘鏘，好親像發生什咪

大代誌同款，戲戲嘩嘩大小聲，不知頭尾的人真正吼伊打著驚。

  一陣查某人哪是作伙，話是講沒了，有時細聲講，有時大聲

笑，阮定定鴨仔聽雷，聽無擱愛問，這時陣大聲喉ㄟ秀枝嬸仔

就會送阮一句「大道理」：「大人哪咧講話，囝仔有耳無嘴，

去邊仔七逃。」後來阮就有學到一句猜謎「九個人」，原來是

「三姑六婆」。哈哈哈......真有意思！

  放學轉來，冊包還沒放好，入門就一聲，「阿娘，肉粽好了

沒，阮麥吃肉粽。」阿娘講：「燒燙燙，不通食，等拜拜好

再食。」阮細漢時，想攏無，甘講神明就不怕燒咧？