Contents ...
udn網路城邦
故鄉的冬節-圓仔、菜繭、雞母狗仔 ( 多謝電小二推薦)
2014/12/21 16:06
瀏覽2,023
迴響2
推薦58
引用0

故鄉的冬節圓仔、菜繭、雞母狗仔              

 

  佇冬節這工,阮澎湖人除了(so)冬節圓、做雞母狗仔,koh會包鹹的佮甜的菜繭(kán),炊熟以後,規厝內攏鼻著陣陣米的芳味。

冬節圓仔、雞母狗仔佮菜繭,攏是用米做的。先共秫(tsu̍t)米浸咧水,幾落點鐘後才用石磨仔來挨做米漿,落共米漿倒入麵粉袋仔,缚(pa̍k)(ân),扛石磨仔來(teh)佇頂頭,予水份沓沓(ta̍uh-ta̍uh-á)流予(ta),水份流以後就變成米粞(tshuè/tshè),才共米粞提來(nuá)做一丸一丸,按呢就會使用來圓仔、做雞母狗仔佮包菜繭矣(ah)

圓仔逐家攏會曉的,毋過欲攏平大粒,逐粒攏圓lin-lin是真無簡單的,阮細漢時的圓仔是大粒細粒攏有,歪koh斜眼,阿母講若欲提來拜拜是足歹看的,予阮鬱卒到嘴翹te-te,共阿母應講:「會食的著好,莫koh共人嫌啦!」

雞母狗仔是用米粞來揑(liap)做豬、狗、雞、鴨仔等等。記憶中阿媽揑的雞母狗仔上媠,做到足親像的,豬就是豬,狗就像狗,雞母tshuā規岫(siū)的雞仔囝,予人看著誠佮意。阿母揑的雞母狗仔嘛足媠的,豬仔、狗仔、雞鴨逐隻攏肥tsih-tsih,足古錐的。啊若阮這囡仔揑的是看攏毋知咧做啥貨?雞母狗仔若炊熟是媠噹噹,攏毋甘共亻因 (in)食掉。

菜繭是用米粞做皮來包餡,鹹的是包高麗菜,芹菜、豬肉、魷魚等,甜的是包塗豆((tsing))佮芹菜珠仔,炊熟是食丘(khiū) koh芳,兩種口味攏真好食,我較愛食包塗豆的,彼種滋味予阮到今(tann)攏猶會記得。

結婚後,阿母有幾落擺佇冬節前,攏對澎湖寄伊做的菜繭來予阮食,後來阮毋甘予阿母傷操勞,共阿母講毋免koh寄矣!有一年,阿母koh寄菜繭來,是去馬公(Má-king)市仔買的,阿母佇電話中講伊無夠力通挨石磨仔,就買便的來食,koh講買的無伊做的好食,我食了嘛是按呢感覺,生理人咧(teh/leh)賣的攏做細細个仔koh減料,確實佮阿母親手做的是天差咧地,無得比矣。

今仔日是冬節,查某子早著買桂冠的圓仔等我煮,毋過,我頭殼內想的是故鄉的冬節日,佮阿媽、阿母、小弟()鬥陣包菜繭、圓仔、捏雞母狗仔的情景……,愈想愈數念爸母……,拍開電腦,用skype敲長途電話佮阿母、阿爸輪流講規點鐘的話,後來嘛講著菜繭,阿母講村內活動中心有舉辦做菜繭的活動,伊有去參加,講少年的跤手足猛(mé),一人做數十个,阿母講伊才做十外个爾爾,我笑笑共應講:「是做趣味的啦!做有夠食就好矣!傷濟食未了。」阿母聽了才笑出聲講:「是矣,有夠通食就好矣!」

故鄉的冬節,留予阮深深的記憶,爸母的親情上寶貴,定定溫暖佇阮的心頭,啊那村內舉辦做菜繭的活動,是欲予少年輩的攏學會曉的冬節圓、做雞母狗仔佮包菜繭, 傳承古早味的冬節日,一代koh一代 ……               

                                                     minda 寫於2008冬節 / 2014.12.16  

附註:

(tshuè/tshè)去水的糯米團。糯米浸泡後磨成漿,裝入布袋中,上放石塊或

                         木棍壓一段時間,使其排去水分成糯米塊,可用來做粿、湯圓

                         等。例:粿粞、米粞。

tsih-tsih(肥朒朒puî-tsut-tsut又唸作puî-lut-lut)胖嘟嘟。形容肥胖的樣子。

* 圖片-澎湖縣府網。

 現代人做的媠koh古錐的雞母狗仔。 

鹹菜繭包著足鮮臊的餡料。       

有誰推薦more
全站分類:創作 散文
自訂分類:散文
上一則: 風颱蘇迪勒 / 爸爸節
下一則: 綠竹
迴響(2) :
2樓. 瑀璇心語udn
2014/12/22 21:34

minda:

這做得好可愛~

多謝~台語不輪轉羞

祝福您 冬至及聖誕新年愉快

闔家平安

是也誠古錐,阮故鄉的冬節足使人懷念,多謝好友來分享。 
也祝福汝冬節佮聖誕佳節愉快。
minda2014/12/22 21:37回覆
1樓. WWS
2014/12/22 10:29

復古 可愛  多采多姿 的傳統

祝福好友 歲末佳節 順心如意  闔家吉祥

故鄉的冬節誠使人懷念,多謝汝來分享。
也祝福汝冬節佮聖誕佳節愉快。
minda2014/12/22 21:32回覆
發表迴響

會員登入