Contents ...
udn網路城邦
跋一倒抾著金雞母
2016/02/29 11:52
瀏覽518
迴響0
推薦4
引用0

跋一倒抾著金雞母

佇日本,一个十幾歲的查埔囡仔不幸車厄,失去左手骨,伊猶原無失去繼續學柔道,做一个一等一柔道高手的向望,決定佮一个出名的柔道老師學功夫。

伊誠骨力學,毋過伊袂了解的是,六個月過了,老師干焦教一彼招爾爾。伊忍袂牢請問老師:「你敢會使閣加牽教我一寡功夫?」

老師應伊講:「你基本的招數已經足熟手,你共這一招練予老到就會使矣。」雖然查埔囡仔並不了解老師的用意,毋過伊相信老師的話,繼續綿爛慣練。

幾個月過了後,老師決定tshuā伊參加柔道升段審查比賽。佇比賽當中,伊真熟手運用老師所教的步數,過關斬將,一關過一關。一直到決賽,雖然對手不止仔高強,伊差一點仔接載袂牢強欲拍輸,伊猶原心頭掠定,一番苦戰了後,煞轉敗為勝,得著頭名。

轉來路裡,查埔囡仔請問老師,是按怎干焦用老師教的彼一招,就會當贏這場比賽?老師回答伊講:「這有兩个原因:一、我教你的式數是柔道內底上困難的一招,你煞真精通。二、對手想欲破解這一招,干焦一个撇步爾,就是愛搦著你的左手。」

這個查埔囡仔上軟汫的所在,煞成做伊贏過別人的關鍵。咱人攏有伊上軟汫的所在,咱若有志氣,閣拚勢,「一枝草一點露,隱痀食雙點露。」天公伯仔會疼痛咱,總是會佇咱上軟所在,予咱意料袂到的助贊。人講「人矮只是跤較短,志氣才來拚懸低。」有志氣肯堅持,才會機會將缺點變做成功的上懸點。原來成功是予肯堅持繼續拍拚的人,成功往往佇坎坎坷坷搖櫓搖晃了後斡角的所在。2016.02.21.故事譯寫自網路熱門文章《失去左臂的祝福!》

聽錄音檔請在三角形鍵按兩一下


有誰推薦more
你可能會有興趣的文章: