Contents ...
udn網路城邦
母喪安神藥帖
2010/10/05 19:42
瀏覽1,197
迴響3
推薦6
引用0

母喪安神藥帖-伊呀已經行遠去

伊呀1西方去,雖是到佛國,無奈心內悲,想欲勇敢放予離,目屎毋願滴!毋是放袂2落去,毋是對佛慈接引有懷疑,只是,從今以後看袂著伊,伊燒燒的手袂閣牽著阮冷冷的手枝,袂閣聽著慈祥溫柔關心我的話語!我知影你已經行遠去,你嘛袂閣歡歡喜喜陪伴佇阮的身邊!到今,我才知了解「悲傷」叫啥物3,「失落」是怎樣的稀微,好親像無你,我就活袂落去,我毋知活落去到底閣有啥意義。   

這種的痛苦真複雜,無底通講起。氣,氣我家己袂當有好跤4好手照顧伊,氣我激無一點仔氣力,會當安慰伊身心亦苦亦憂的交纏。行到欲斷氣,猶是對我操心到按呢生,人講人生無不散的宴席,愛有勇氣面對佮支理。這款的道理我知機,只是親情的斷離,對我來講,袂輸失魂去,慈恩袂報,勇氣變做受氣我家己,足想欲綴6你去,早暗通好伺候你。  

乖囡咧,自古以來生離死別是人生的大戲,衰老的身軀借我用甲遐濟7年,敢講免予歇睏,就愛拖磨甲賰8無一个氣絲,悾悾戇戇倒佇病床咧開錢。乖囡咧,我嘛知你是毋甘,毋甘的目屎你閣賭強吞落來。吞落來的目屎你並無消化,變成千斤重,硩甲你的情緒身體欲崩去!請你仙毋通,欲哭你就勇敢哭出來,哭,才會消透你滿腹的愁懷。時間一工一工過,慢慢就會消納彼分牽腸割肚的疼!看你化袂開,人神神,家庭生活亂廢廢伊呀敢袂心搐,敢會安寧!你愛學會曉寶惜家己,毋通因為你化袂開,變成伊呀的拖累! 

乖囡咧,死,雖然袂當閣相見,思念總是會當隨時囥佇你身邊,彼是上溫暖、上純情的記持。無呢,你看著的是面仔骨骨憂愁的面容,瘦枝落葉9破糊糊的老機器。活,袂快活,死,袂斷氣,這叫做「酷刑」,這叫做「凌遲10」!你敢愛伊呀受這款的拖磨,按呢接紲11落去。伊呀是借生老病死的苦來教你,共你講刻骨刻肉「世間是苦」的道理!因為「無常」,不得不愛參所愛的人分離,姑不將攏會拄著無佮意的代誌,咱所求的無法度全部照咱的意,擁有的也會拍無去,悲憂苦惱是四常發生的代誌,這,攏是世間的真理,足自然的道理! 

乖囡咧,親人分離會悲傷是當然的代誌,有生有死嘛是性命的傳奇,死是大自然的公平佮慈悲,無死的人生有啥好趣味!死,毋是毀滅,毋是烏有,是重頭生!既然欲去「生」,像一台破車害朽朽,閣換新車繼續跑、繼續來去,何用悲傷來讚美!尤其是,病苦袂醫得,死,顛倒是一種解脫,一種卸了重擔的秋凊12,會當好禮仔歇睏,是天福毋是不幸,你那著面憂憂心肝拍結毬13。愛知:過度的悲傷並無代表才是愛伊,真情的數念毋免用悲傷來觸纏14。悲傷像一蜷15索仔,愛沓沓仔16一條一條來17,用時間勻勻仔18來治療。 

喪親之疼,好像心肝雄雄夆19裂做兩爿20。予悲傷自然流露出來,莫共壓制。喪親的悲傷是正常的,毋過愛共內心的悲傷講出來,毋通孤孤單單一人咧悲傷,毋通拒絕別人的關心佮協助。接受死亡的事實,慎重對亡者告別佮祝福,靈前稟告、寫批、寫文章、誦經念佛……。逐工固定一點仔時間想伊呀,其他的時間就專心做你的工課。慢慢固定時間彼一點點仔的悲傷,嘛會慢慢仔薄去。 

愛知,悲傷是會當停止的,過度的傷心並無意義,你愛想按怎做才是亡者上歡喜的,伊敢愛你閣遐呢過度悲傷!悲傷,有時一段時間會閣浮起來,有時悲傷是無遐緊就會消除。暴風雨過了,愛回復本底現實的生活世界。結束悲傷,並毋是抹銷對伊的愛或者是思念,而是接受已經往生的事實,愛伊的心並無改變,伊的風采照舊,咱永遠敬愛伊。 

失去伊呀,咱猶有濟濟無失去的,更加愛去珍惜。伊呀一定向望你,歡歡喜喜平安過日子,照顧予好家己,照顧厝內的人,照顧你年老無老伴的阿爸。這久,你彼款無神彩的範勢21,自身就難保,甭講其他!這久,上重要的是愛振作,愛看開,看開死亡佮無常的真理,體會伊呀死亡留予咱的意義。猶有,阿爸需要你歡歡喜喜安慰伊,將你體會的道理帶予阿爸平安行落去!    2010.10.08.寫予好朋友茄仔色

註釋:

1.伊呀:母親。

2.袂:bē/buē不。否定詞。例:袂曉(不會)、袂講得(說不得)

3.啥物:siánn-mih什麼。

4.跤:kha腿、足。例:跤尖手幼 (手細腳細,形容讀書人的樣子。)

5.佮:kah和、及、與、跟。

6.綴:tuè/tè跟、隨。

7.遐濟:hiah-tsē/tsuē那麼多。

8.賰:tshun剩餘。

9.瘦枝落葉:形容身體枯槁消瘦。

10.凌遲:lîng-tî,受到極殘酷的手段的虐待、凌虐。

11.接紲:tsiap -suà接續不斷。

12.秋凊:tshiu-tshìn涼爽。清涼舒爽。

13.phah-kat-kiû心情鬱悶不解。

14.觸纏:tak -tînn糾纏。

15.蜷:khûn計算纏繞成圈狀物的單位。

16.沓沓仔:ta̍uh-ta̍uh-á慢慢地。

17.敨:tháu解開。

18.勻勻仔:ûn-ûn-á慢慢地、謹慎小心地。

19.夆:Hông,台語予人hōo- lâng的合意,讓……。

20.爿:pîng邊。表示所在位置。

21.範勢:pān-sè情況、態勢。事務的實際狀況。

有誰推薦more
全站分類:知識學習 其他
自訂分類:華語作品
迴響(3) :
3樓. 怪怪
2010/10/07 23:28
甘心

足甘心

居士開釋   多人受益

2樓. 常文
2010/10/06 09:39
感人好文章
透早 賞讀文的時 

鼻頭酸酸 目眶紅紅........

感人好文章....

這帖治心病的特效藥

真好用....

有治療兼預防的作用

1樓. sann(33)翠苓
2010/10/06 08:46
。。

昨暝文章看了[哭花了臉]...驚翁婿看著會著驚,我假仙去睏

真正睏去...

長期來難得一擺的一夜無夢,早起醒起來,心肝頭足輕

居士症頭掠著、藥劑落重,將心肝底彼粒石頭溶掉.....

除了感謝....毋知會當講啥