哀 章

維中華民國九十八年十一月二五日，你的孫兒○○以哀香一柱、花果疏食，致祭於您的靈前，表達阮對您無盡的感激、哀思。

敬愛的阿媽，雖然今仔日你的序細有人無來，毋過阮猶是以無盡的哀思、無盡的感思，盡心為你送別。

當微微仔風，吹過一叢拄咧開花的樹，有時陣花蕊落甲規土腳，一寡閣牢咧樹仔頂，結做細細粒青色的果籽；風閣吹來的時陣，一寡果籽嘛落落來，佇落落來以前，有的已接拄欲黃仔爾爾，有的已經到分。人，就親像風中的花朵和果籽，佇性命的無同的階段『落落來』。

坎坷的一生，你猶原是面笑笑，堅強過日子，我阿爸別世，你跋倒，舊病發作，虛荏的身軀體未堪得折磨，你抵抗治療，你毋肯食，我想您已經有了上痞的撲算。佇阿爸過身了第三十六工，你嘛離開阮，離開這個人世間。毋管按怎講，一切的歡喜哀愁，一切的恩怨也綴您消失無蹤，一切的苦難嘛攏無去了了，你人生的責任也已經完滿，你會當好禮仔歇困！遠離了紅塵，這是解脫。

阮猶原會數念你，雖然親人愈來愈少人，阮會感覺空虛寂寞。不過，咱的心佮伊的心並無分開，相信你仝款會關心阮、保庇阮，你永遠是阮上敬愛的序大，你的面腔、你的形影，永遠牢佇阮的心目中。假如拄著啥物困難，阮嘛會學您笑笑面對。有一句話真好：佳哉所有的代誌攏會過去～～。

阮佇遮做伙深深共您祝福，祝伊一路順風。今日靈前祭拜蕪詞數語寄哀思，阿媽有靈來格來嘗，哀哉，伏維尚饗。

孫兒○○　百拜