食魚趁鮮（tshinn）、賞花趁時，閣是油桐花大開的季節，好朋友！欲看桐花跤手就愛緊喔。

家己一个人想欲去看花，會當講行就行，若是組團坐遊覽車去看花，到時陣定定會失望，因為花開無欲等待人。

組團出發往往因為消息傳出去佮受理報名愛有較長的時間，所以愛預定出發的日子；毋拘，定定起程的日子參花開的日子煞未拄好，有時花蕊才扑莓，有時花已經徛黃偆無幾蕊。上懊惱的是，昨暝雄雄一陣雨，無情的踳踏，花蕊澹糊糊，有的是碎糊糊落甲通（thang→tong5）四界，使人也毋甘也蹔蹄（cam3 te5跺腳）！

即擺慧海舉辦蓮友慶祝母親節活動，4月24才寄批通知，今仔日5月初一就出發，會當講是上蓋趕狂的一擺，主要原因就是欲掌握花蕊大開上嫷的時陣。賞油桐花的地點選擇嘛是大學問，官方的資料一大堆，毋拘無一定會符合遊客的需要同。即遍網友推荐新竹縣芎林鄉的鹿寮坑桐花步道，講是路好行無蓋崎，代先嘛參當地的社區團體聯絡過，請怹到時帶阮行踏紹介。

透早唯虎尾出發，到新竹縣芎林才九點爾，負責導遊的人先帶阮去客家媽祖的「五和宮」參觀，主神媽祖聖像是福建汕頭來的。廟方熱情歡迎，並且準備客家麻糬佮泡茶招待阮逐家，紲落遊覽車開向「燒炭窩桐花步道」入口，因為路頭有自用轎客停椆咧，遊覽車無法度開起去，其實彼條路嘛無適合踅頭的所在。

沿路看著對面山坪，樹尾一簇一簇白色的油桐花，斡入去細條路仔，路邊油桐花落甲規塗跤，舉頭一看，油桐樹真懸，樹葉樹枝閣遮閘，佇樹跤顛倒看未著花的影跡，佳哉最近囡仔幫我換一台數位相機，鏡頭聽好揪長，會當翕著較遠的景物。行倚「大樹群」，逐家坐踮一兩百冬的楓仔樹跤，是一个觀景台，有柴椅仔，身軀涼爽、心情快活！

閣行入一條「桐花林」細條路，清風微微，空氣清幽，山嶺青藣藣，景色真好；美中不足，雖然號做「桐花林」，實際上有較膨風寡。

一段路行了，桐花看了未紲扑，就返頭行轉來怹社區頭人的厝兜歇睏，怹兜的岑簷跤佮樹仔跤坐滿這群不速之客，主人無閒泡茶請逐家。這座厝正對面遠遠是五指山，頭前有溪谷，倒爿的山崎有兩、三欉油桐花當咧開，像白雪崁佇樹尾溜，真嫷，好像人間仙境。厝身大廳的門聯按呢寫：「門對青山山色秀」，「戶迎綠水水長流」，優雅的景緻配合著真有詩味的門聯。

佇怹的埕裡閣看著阮遐無的「燈籠仔花」，主人共樹椏切一截一截送蓮友欲轉去插枝。中晝就佇遐食家己準備的鹹飯便當，涼風配便當，心涼脾也涼，鹹飯參有鹹菜好食一喙接一喙。食飽一人閣有一包細粒tomato〔番茄〕佮一包純純純的梅仔粉，這頓飯食著真爽。

落山了後本成欲去參觀香菇寮，到位才知影無香菇通看，感覺無彩。車底共逐家講起欲看桐花上讚的是佇三義的「桐花走廊」彼片，才是名副其實。無疑誤逐家煞表示講早起看的油桐花無到氣癮，捌去過「桐花走廊」的蓮友閣講奚的桐花確實真嫷，結果共欲去五穀文化園區的行程忽然間改做去三義。

高速公路欲落三義路段，才發覺塞車塞甲足嚴重，就按呢那行那停到街仔，通常外客攏行木雕館這條路線，才唯「四月雪小徑」行到「慈濟茶園」看桐花。所以過了往木雕館彼個路口，車就行了真順序，因為頂幫有當地的導遊帶阮行後山彼條路，就是行到三義火車頭前，甭上高架路橋，幹對正手爿48縣道，大約20分鐘就會看著路邊停真濟車的所在，倒手爿有分叉路，對起去就是「桐花走廊」步道。

「桐花走廊」的特色是路真平，路兩爿是油桐樹，倚近鼻花芳，看懸賞花欉，遠遠的山腰逐跡白雪雪的桐花吊樹尾，桐花沿路落甲滿塗跤。閣定定看會著桐花飄落來的身影，尤其予桐花唚著頭殼是上趣味。頭若舉懸，桐花有時嘛無客氣，會唚著你的喙髀（phue2）。欲看桐花有一個秘訣，就是愛透早看，因為昨暝佮透早交落的花已經舖滿著小路佮樹欉，一片「白泡泡、幼麵麵」的景色，真壯觀真迷人。若下晡才來，交落的花毋是予人撿走去，嘛會予人踏甲碎糊糊，干單賰少少的落花佮樹頂咧曳手獻媚的花蕊。

看桐花實在是看伊像仙女下凡，婀娜的身影，輕搖搖來降落。毋過，毋知偌濟人行過油桐樹跤，毋知有偌濟人認捌「逐蕊油桐花攏是一工的性命爾，伊用上蓋燦爛、上蓋美麗的性命護著母欉生淀，家己犧牲墜落塵土，一蕊閣一蕊，前行後畷，佇人世間的道路舖了一層淒迷的五月雪！」

嘛無偌濟人會當體會「嫷花予咱讚嘆，共時陣嘛予咱感嘆，拄看伊青春花當開，毋免等甲凋蔫，隨看著怹挨挨陣陣花謝落塗」彼種也歡喜也憂怨的心境！（2009.05.05.）