春風吹過阮的心園－寫予恆嘉仙

 您像春的砲仔花

佇寒冬過了

彈出熱心的腹腸

炒著冷去的凊飯

芳芳好滋味

食甲飽嬰嬰

 您無意中來分離

敢是趕去天庭

教神仙寫台文

閣有未醉的甘露lim免錢 

真理大學台文講師

陳恆嘉老師2009/2/25中晝因為感冒併發別世 

    參加真濟擺台文研習，大部分攏有拄著陳恆嘉老師共阮上課，伊講課內容真豐富，話閣笑詼，定定有意外的台文niu2 su3，心內對伊為台文滿腹熱情咧推捒萬分敬佩，伊的頭毛白甲差不多，毋閣猶閣輸我這個白甲的發金的頭鬃。蓋可惜的是，真罕看著伊的台文作品。伊捌佇淡江大學、真理大學、中山醫學大學教台文課程。

    今日陳金順老師來電子批附著對「恆嘉仙」的追思，才知恆嘉老師已經離開世界，心內不止仔心悶心疼。伊佇1993.12．前衛出版社有出版伊的著作《陳恆嘉集》，彼時陣冊內底的紹介是按呢：，.

陳恆嘉，大半輩子從事國小、國中、高中教育，小說題材往往從生活經驗中來。從〈老師：人家也要升旗〉到〈剝〉，小說人物皆為老師或小學生，以他們的觀點來透視社會問題；從天真無邪的角度，來探觸人生的心靈深處，甚至於賦予更深沈的政治寓意。
　　陳恆嘉的小說人物，往往是低層、卑微的，但是流露出來的卻是意義深遠，讓人不得不感受到含淚的悲酸；他的筆調幽默風趣，在喜趣的背後，卻埋藏著發人深思的課題，以及犀利的社會反抗的原意。

陳恆嘉，1944年生於彰化溪洲，1962年處女作〈橘子、雞、毛線衣〉入選《本省籍作家作品集》，1963年就讀台中師專，結識陌上桑、洪醒夫等文友。
　　1967年開始以「喬辛嘉」筆名寫短篇小，1970年與陌上桑、洪醒夫等復刊《這一代》雜誌，六期後停刊。
　　1971年入淡江大學中文系，並轉任國中師，1975年出版短篇小說集《嘩笑的海》。1977年中篇小說〈古董田〉發表於《中央日報》，並赴日進京都大學人文科學研究所。
　　1979年返台，任《書評書目》副社長及總編輯，1983年擔任《聯合報》編輯，之後轉任「時報公司」編輯主任，1987年入東吳大學日本文化研究所，現為高中國文老師。

前衛阿嘉 　　　⊙陳金順 

  　　老實講，到這當今我猶感覺我參阿嘉無偌深緣；不而過，我相信阿嘉飄撇的形影、浪漫的歌聲，的確會久長留踮我的腦海內。 

　　雖罔十外冬前初初參與台文運動的跤兜，就捌見過阿嘉一面，佇我的記智內底，彼時你的頭毛就染霜雪，坐踮我的邊仔，你予我的第一印象是一位顧謙有修養的頂輩。減采你咱淺緣，一直無進一步交陪的機緣，落尾佇你為少年阿文仔的詩文集《海翁》踏的話頭裡，才知影你是一位佇咧大學教台文的 先生。 

　　2005年，我入前衛出版社無偌久，阿嘉受社長邀請擔當總編的職務，這對你來講減采是桌頂抳柑的空課路，你逐禮拜照常愛去就近的三間大學繼續兼課，繼續趁遐的薄釐絲的鐘點費。彼冬十一月底，佇我踮前衛食頭路的尾工，欲暗六點跤兜，我準備欲揹kha-báng坐捷運淡水線轉去枋橋的坎站，阿嘉唯兼課的學校裡敲電話入來公司，喚我愛聽候你轉來公司，你欲請我食暗為我送別；其實，我心肝內感覺受當袂起，毋過歹勢切你的意，小弟頇慢啉酒，所致規暝以茶代酒感受你的溫情。 

　　落尾，逗逗仔唯朋友的喙裡輕輕仔講出你的遭遇、你的家庭，小弟才深深感受是按怎這個世間遮呢無公平？是按怎濟濟像你遮呢有才情的人，會一生攏佇茫茫人海裡沐沐泅，揣無一條較好的出路。論真，我哪會毋知影這款世間的現實咧？文學家、藝術家在生看活過日、榮華富貴的自底就無幾口灶，親像受世間濟濟文學信徒欽服露西亞的契訶夫佮法蘭西的莫泊桑，怹參你相像是短篇小說的寫手，怹攏phīng你較短命，四十統歲就離開世間，不而過，怹攏留落數百篇短篇小說，予世間人借鏡；較可惜的是阿嘉你這個所謂戰後第二代的文學青年，減采受生活拖磨、環境所致，到tann創作總成績攏囥踮你咱鬥陣蹛過的前衛出版的《陳恆嘉集》裡。  

　　古早人講得無毋著：「近廟欺神。」到這當今，我才想欲買你彼本少年時代用青春血汗所粒積出來的小說集，有影不止仔歹勢！尚且小弟舊年底出的散文集《賴和價值一千箍》，猶未親手交予你，想袂到你無話無句恬恬來離開。 

　　好佳哉，十外冬來你佇幾落間大學掖種，傳授下輩人台文相關的智識佮經驗，嘛展現你創作以外的才情，書寫台語文學、台灣歌謠相關的論文；閣較予小弟欽服的是歲頭食到六十，你猶落南來成功大學台文所讀 博士，雖罔袂赴完成論文戴彼頂頭毛落霜的博士帽仔，踮朋友弟兄的心肝底，你飄撇的文學氣質袂較輸濟濟食無三把蕹菜的文學博士。 

　　舊年12月13是你咱最後見面的時間點，踮台灣文學獎的地場，你代表評審上台鼓勵得獎佮入圍台語小說的友志，感受你對台語文學的真心佮疼意，佇台灣文學館，佇你風霜的面頂，我看著友志相疼痛的深情。仝日下晡，你為著得南瀛文學獎佮出版作家作品集的幾位友志，陪伴眾人到楊逵紀念館觀禮，你的身影予長松化作永久的寫真，這是你最後一擺活靈靈徛踮小弟的目睭前。 

　　唯你一寡對文學見解的片段，我知影阿嘉你毋是袂曉變竅的 文學 教授，嘛毋是干單會曉編死冊的總編輯，你絕對是一位予現實環境埋沒才情的前衛阿嘉。 

　　阿嘉，毋通閣啉酒醉，你就勻勻仔行。  

──2009.2.26寫佇阿嘉過身第二工，台南大學碩士生研究室。