『一個囡仔』

一個囡仔佇咧吼，
雄雄看著一隻狗，
囡仔起跤走，
煞跋倒兼捙畚斗，
阿娘外口糴米一斗，
轉來卜煮晝，
囡一面哭一面吼，
無愛食中晝。
怹娘竹仔枝一下到，
囡仔起跤走，
一時心情亂糟糟，
勿擱吵，勿擱拗，
趕緊轉去恁兜。

『一個囡仔』

囡仔看著狗，
著驚煞咧吼，
起跤想卜走，
啥知跋倒佇埕斗。
囡仔哞哞哭，
吼甲卜中晝，
怹娘心肝亂嘈嘈，
竹仔枝一下到，
囡仔毋敢擱再哭，
風真透，趕緊轉去恁兜，
恁兜佇海口。

猴佮狗也有兩種版本喔：


『猴佮狗』

樹頂一隻猴，
樹跤一隻狗，
猴看著狗，
狗看著猴，
猴走狗嘛走，
毋知是狗驚猴，
抑是猴驚狗。

『猴佮狗』

一隻猴，真正賢，
帶一陣猴子去挽豆仔，
一隻狗，真正老，
亦帶一陣狗仔去食包仔，
迄陣猴仔佮迄陣狗仔，
行到後壁溝仔，
拄著人咧放炮仔，
猴仔去撞著狗仔，
狗仔去踢著猴仔，
猴仔罵狗仔，
狗仔咬猴仔，
猴仔用豆仔去丟狗仔，
狗仔用包仔去丟猴仔，
狗仔吠，
猴仔嚎，
毋知是狗仔驚猴仔，
抑是猴仔驚狗仔，
猴仔走，狗仔亦走，
規條溝仔攏是豆仔佮包仔。

【基隆加人 】

一個查甫去基隆賣雞籠，
一個查某去基隆賣假人，
賣雞籠个佇基隆拄著賣假人个，
賣假人个佇基隆卜嫁人，
嫁一個翁加一個人，
生一個囝加一個人，
基隆加人。

秀才

秀才 秀才 秀才 騎馬浪浪來

在馬頂 跋落來 跋一下 真厲害

嘴齒痛 糊下頦 目 痛 糊目眉

腹肚痛 糊肚臍 嘿！真厲害