Contents ...
udn網路城邦
麵線糊的春天〈第一部曲〉
2011/02/12 10:47
瀏覽262
迴響0
推薦0
引用0

阮最近咧整理早前寫的詩文,

先完成一部分號名叫做『麵線糊的春天 第一部曲』。

【離別的月台】

 

之ㄧ

火車還未開震動
天 落著毛毛仔雨
阿爸
置車窗外 恬恬看著阮
目睭有講未出嘴的毋甘

阮洶洶喉滇
目屎親像落雨
彼年 阮才十六歲

 

之二

 

彼年阮置故鄉離別的月台
撿著一個叫做鄉愁的幼嬰
從此阮用思念來飼
才兩三工的時間
伊就比阮較大漢
日日夜夜
是阮青春 唯一的友伴

 

【孤單】

 

之一

 

日頭淺淺 淺淺照置芋田
白雲輕輕 輕輕飛置天頂
芋葉親像一支一支的雨傘
借南風甩掉傘頂的露水
芋田邊的野花笑到搖搖擺擺
春天的早起
有寒冬未走的空氣

 

之二

 

春天的茫霧
用溫柔的紗巾 包著路燈
冬天的孤單佮寂寞
攏置微微的燈光 流失

提早來的春天
有點桃花的胭脂
抹杜鵑的水粉
美麗是春天的本事

 

之三

昨暝 寂寞來過
將阮的心吊置半空中 一望無際
下面是茫茫的大海 看無著底

孤單是陣陣的海風
將阮當作風吹 存心吹弄
置半空中 踅阿踅

 

備註..踅→轉,台語音ㄒㄧㄝ

 

之四

 

春天微微的風 有叫阮的聲音
春天白濛濛的天 有慈愛的笑容
春天綿綿的雨 有阮思念的目屎

 

每一個的暗暝
白色的月光
偌阿母的手 輕輕
安慰著阮稀微的心!

 

之五

 

一個郎置海邊散步 海風吹著長頭毛
只有影跡 綴阮的腳步
幼綿綿的海沙印著阮的腳跡 親像阮纏綿的寂寞
 
海湧開的白色花蕊 這尼燦爛
遂佮阮同款 無郎疼惜
只有日頭置彼爿的地平線 掠阮金金看

 

備註..綴→跟著

 

之六

 

秋的雨水
置溪邊偷偷講話
講要佮溪水做夥漂流

秋天的風
置樹頂偷偷講話
講要佮落葉做夥流浪

秋天的月
向阮偷偷講話
講只有伊眛放阮孤單
置稀微的晚暝
月影會來佮阮作伴

 

之七

 

梧桐樹頂的一片落葉
隨在北風吹
輕輕 輕輕落置小窗前
落置窗前的梧桐葉
是阮冬天的心情
一點點阿蕭瑟
一點點阿淒涼
一點點阿孤單佮無奈…


之八

 

親相澹濕的棉被
置冷冷的眠床
蓋著一軀失意的靈魂
心情冬至

棉被披置竹篙頂
予溫暖的日頭曝礁 打鬆親像白雲
期待心情徛春!

 

備註..曝礁→晒乾 徛春→立春
 

之九

 

彼欉鳳凰樹
猶原惦惦徛置門口埕
綁置樹頂的韆鞦
置無月孤星的晚暝
恬恬等阮倒返來

樹頂鳥隻猶置眠夢中
坐置阿爸綁的韆鞦
搖啊搖 只有影跡相隨
阿爸,每冬的二九暝

阮誠心來為您添歲壽

 

之十

 

孤單
迎接每一個黃昏
佮寂寞
共度每一個晚暝
 
十六歲的青春 蒼白
如今回想
心猶原痛疼

 

【青春的戀夢】

 

之一

 

囝仔的夢 鎖置玻璃珠內底
阮開始用青春來編織戀愛夢
初戀的詩句 
是純真的目屎
甜甜的笑容
是一場美麗的眠夢

成熟是眼中消失的春夏秋冬 

人生偌一台火車
郎客起起落落是短暫的緣分
是朋友 是仇人 攏是一時的情緒
越頭看 斟酌想
緣起緣盡 半點不由人
又 何必認真來計較

人情冷暖 敢有叨一項是永遠

 

之二

 

走到這
踏過家己層層疊疊的影跡
回頭 不見來時的路途
滴落來的目屎
是路中央的反光石
遠遠卻是一片黑

母親的面容 偌天星
置黑暗的所在 閃爍

 

之三

 

阮知汝來自何處
汝重重的腔口
是阮思念的鄉音

啊!
原來咱是同鄉 曾經
吃過肉圓 爬過八卦山拜大佛
只是當初不相識
今日相逢置他鄉

鄉愁啊!
置咱的心肝底 打死結

 

之四

 

美麗的花蕊
秋天掖籽
春天莩芛

愛情咧
是置何時掖的籽

是前世約好勢
亦是天註定
或是
置初見面的時
才掖落愛情的種籽

 

之五

 

你親相一片的大海
深 看無著底
闊 靠昧就岸
阮宛然海中的小帆船
任 海風吹
隨 海湧搖
毋知置何時會翻船置你的心房

 

之六

 

情絲
一頭綁置阮的心肝蘡
另外一頭綁置風中的背影
痴心織一場愛慕的美夢
遂換來
憨憨等待的迷惘

 

之七

 

天頂的月娘 猶 
留戀昨暝甜蜜的戀夢 
毋甘落山

昨暝的愛人 
披著花言巧語的外衫 
頭也無越 
消失置路燈最後的光線

 

之八

 

腳步聲 一步比一步較遠
是行置
千萬片落葉的小路 離開

只是你攏毋知
千萬片的落葉
有阮
千萬般毋甘的心情
只是講眛出嘴

 

之九

 

心內有一支鉸刀
想要剪掉佮你的過去
鉸斷對你的思念
無奈
汝是阮心內的魔鬼
毋知何時唸了咒
阮鉸眛落手

過去
宛如一本厚厚的冊
親像一杯苦苦的咖啡
明知滿腹的苦滋味
偏偏一杯擱一杯

讀了一遍閣一遍

 

之十

 

如果人生就是愛經過烈火所煉
終其尾
阮是會變作藝術品予郎訶咾
還是
置烈火中碎去 
存一堆的火麩
佮一聲唉未出嘴的痛疼

 

備註..訶咾→讚美

全站分類:創作 詩詞
自訂分類:詩詞
上一則: 2011-02-24《古早味》
下一則: 2010-10-07記智的河